واجب فتح ملف الفساد و التحيّل الكبيرين في التعويضات للمتمتعين بالعفو التشريعي العام

واجب فتح ملف الفساد و التحيّل الكبيرين في التعويضات للمتمتعين بالعفو التشريعي العام

انا هاني مش نحكيلكم الحكاية بكل تفاصيلها..و نحب موقف واضح...من الزملاء...من الجامعة ...من وزارة المالية...و خاصة خاصة من أحرار المالية و حرائرها. ..

عندنا زميل أسمو صالح السائحي. .أول نهار دخلت للإدارة زات يوم..27 جويلية 1988..لقيتو قدامي..يخدم معايا في نفس المكتب..

السيد هذا بعد مدة عمل شركة هو و مرتو و ما نعرفش شكون آخر. و نصب روحو وكيل.

الإدارة كي تفطنت للموضوع...خيرتو بين حاجتين.اما الاستقالة أو عقوبة إدارية يقررها مجلس التأديب..هو وقتها خذى قرارا بالاستقالة و مشى يخدم في الشركة متاعو..

في الأثناء ..تورط في قضايا متاع شيكات بدون رصيد و ما نعرفش شنو آخر من التجاوزات...تشد و حكموا عليه 20 سنة حبس..عداهم طبعا مع الأخوة و انتم افهموا شكون الأخوة. .

بعد ثورة البرويطة...السيد هذا الجماعة اعتبروه من ضحايا النظام السابق و حطولوا دوسي على أساس عندو الحق في التمتع بالعفو التشريعي العام..

نقابة الاداءات وقتها ..اللي انا كنت عضو فيها ..فسرنا للجامعة اللي السيد هذا لا علاقة له بالعفو التشريعي العام...و أنه غادر الإدارة بمحض إرادته. .ليتفرغ لإدارة شركته...

الجامعة وقتها وصلت المعلومة للجنة اللي لاهية بدوسيات الناس اللي راجعة في إطار صفقة العفو التشريعي العام..و في بالنا أن الملف هذا طرح نهائيا...

اليوم الصباح نهبط للإدارة الجهوية متاعنا نلقى السيد حاطط ساق على ساق في مكتب...و قال اللي هو رجع بحكم محكمة إدارية. ..

مشيت نسأل على التفاصيل...قالولي أن السيد هذا رجع بحكم محكمة إدارية. ..و ما زالوا ثلاثة أشهر و يخرج تقاعد...

لكن اللي يقهر في الخبر ..و ركزوا معايا في هذا...السيد هذا..حسب ما بلغني من الزملاء في المركز...

مش يأخذ تعويض على كل المرتبات اللي ما خذاها. . على السنوات الكل..اللي في الشركة و اللي في الحبس...

يا بو قلب...تعويض شنو و على شنو؟؟؟

و التعويض هذا مش نخلصوا انا و انت و انت ..على موضوع فيه فساد..

ياخي موش قالولنا البلاد فالسة و يلزمكم ..(انتم الإجراء) تضحيو معانا؟؟؟

ياخي فالسة علينا...و موش فالسة على أصحاب التعويضات المشبوهة؟؟؟...

انا ..بصراحة...مانيش مش نسكت. ..و مش نتبع الملف هذا...مع الإدارة العامة...مع جامعة المالية. ..مع وزيرة المالية شخصيا. .. مع المحكمة الإدارية. ..اللي يحب يعاوني في الملف هذا يتفضل...اللي ما يهموش الأمر. ..يشد بلاصتو و يسكت. ..

انا ما عنديش مشكلة مع الشخص...عندي مشكلة مع الفسااد. .

Henda Ben Yahia