كل الرؤساء حكموا بلدانهم لأول مرّة فلماذا تعيبون ذلك على حمّة ؟
بربي جماعة الباجي اللي عندهم شوي عقل ، قداش يلزم أقدميةيتمع بيها المواطن التونسي للرئاسية باش تسمحولوا يقدم مطلب ترشح لهذه الخطة المحنونة ؟
إثنين ، ياخي شرط الاقدمية اللي فرضتوه على حمة ينسحب على بقية المترشحين؟؟؟
ثالثا ياخي البجبوج متاعكم عندو أقدمية في ممارسة خطة رئيس دولة؟؟؟
أول مرة نستعمل الخطاب السياسي المباشر لمحاججة خصوم الجبهة الشعبية وخصوم مرشحها للرئاسية وخاصة جماعة البجبوج اللي نقبولنا كلاوينا من هدرة " حمة ما عندوش الخبرة في إدارة دواليب الدولة".
يا سيدي صحيح اول مرة حمة يفكر بشكل عملي انه يولي رئيس دولة تونس ، أولا ، ياخي الراجل تونسي وإلا هو مستورد من الخارج باش تحرموه من حقو في آعتلاء كرسي السلطة ؟ ؟؟
وياخي شبيكم السؤال هذا ما طرحتوهش على بقية المترشحين للرئاسية ، شبيكم ما طرحتوهش على الباجي اللي هو أول مرة يترشح للرئاسية ؟
شبيكم ما طرحتوهش على الزقزوقي اللي خرب البلاد وخلى المجال واسعا للإرهابيين ؟
شبيكم ما طرحتوهش على النابلي والشابي وكنو والسعيد وبقية السبعة وعشرين ؟
علاش مصرين على إحراج حمة الهمامي خصيصا وتحبوا تثبتو اللي هو عاجز على إدارة الدولة و تجبرونه على التخلّي ؟؟؟
ياخي أوباما وقت ترشح لرئاسة أعظم دولة في العالم كان عاجز على آداء مهمته كرئيس دولة ؟؟؟
ياخي زعماء دول أمريكا اللاتينية اللي طلعتهم الصناديق كانوا عاجزين على إدارة دولهم ؟؟؟
ياخي ما نجحوش رؤساء أمريكا اللاتينية في تقليص حدة الأزمات اللي كانت تعانيمنها الدول متاعهم ؟؟؟
ياخي زعماء بلدان شمال أوروبا اللي يحققوا أعلى نسب تطور ونمو في العالم في حاجة أنكم تقروا بالاهلية متاعهم ؟
وخليني نكبرها ياخي لينين العظيم كان في حاجة لشهادة من عندكم باش يشيد صرح أكبر دولة عظمى في العالم؟؟؟
وياخي ماو تسيتنغ كان في حاجة للموافقة متاع مجموعة من العجزة مثلكم باش يعمل أكبر ثورة في التاريخ الحديث ؟؟؟
ياخي هل كان ماوتسيتنغ في حاجة لنصائح بعض الفاشلين مثلكم باش يعمل مع شعبو أعظم وأكبر ثورة في التاريخ المعاصر ؟؟؟
بربكم المعبود شوفوا حجج تقنع بالعقل من غير دروس فاشلة لمعلمين فاشلين في آداء واجبهم التربوي
منقول عن حبيب بوعوني
Aucun commentaire:
Enregistrer un commentaire