في الزمان المعكوس الفار يولي قطّوس

لقى المدينة خالية قام فيها الاذان

مَبْعِدْ مَكّة على بُوصبّاطْ

اللّي يقصد يقصد دار كبيره

كي الخنفوس، لا يِتاكِلْ لا يِتْلعَبْ بيه

جبيبتك ما تبيعها تشتهيها في ربيعها

اعطيني قرطلتي ما حاجتي بعنب

صبري على روحي ولا صبر الناس علي

الدوام ينقب الرخام

يتعلم في الحجامة في روس ليتاما

بيني وبينك اذبحني وبين الناس لا تفضحني

عريان يسلب في ميت

يِشْطَحْ عْلَى طَارْ بُو فِلْسْ

إلي يحبني نحبو فوق المحبة بكيف ..وإلي يسبني نسبو كان يبدا بوه شريف

 اليدين بالحرقوس والتراكن بالخنفوس

الي فيه طبة عمرها ما تتخبى

الٌي يحسب وحدو يفضللو

الصحبة صحبة والنية ما فماش

اللي دارو بلار ما يضربش دار الناس بالحجر

الي فاتو الحديث يقول سمعت و الي فاتو الطعام يقول شبعت

أنا و خويا على ولد عمي و أنا وولد عمي عالغريب

ما خص المشنوق كان ماكلة الحلوى

سارق وفي يدو شمعة

راس الهم دادا عيشة

كان النواح بالطلبة الله لا يرحم من مات

إلي عطاك حبل كتفو بيه

العزوزة هاززها الواد و هي تقول العام صابة

يوفى مال الجدين و تقعد صنعة اليدين

إذا تحب تعلم ولدك الكلام خدمو قهواجي و الا حجام

يطول ليلها وتعلف

الله يلهينا بحوايجنا

ولد الفار يطلع حفار

يدّ وحدة ما تصفّقش أما تصرفڨ

اللي باعك بالفول بيعو بالقشور

مايلزك عل المر كان اللي أمر

لا تدخّل ايدك لمغاغر ولا تلسعك لحناش

كيف قطاطس باردو الشر والخلاعه

ملي دفنوه ما زاروه

اللي يعمل يلقى

عامل كيف الدجاج كل نهار يقول غدوا انطيرو

قالو ويني وذنك قالو آآآآههههييييي

من فم البير ولا من قاعو

الوقت معكوس سكت الكنالو غنى الخنفوس

المطر في ماطر و الزلق في تطاوين

داهم على جبل بقادومة

كسكسلو يرجع لصلو

العظمة ما تقول طق الا ما فيها شق

كان البومة فيها الخير ما يخلفوها الصيادة

اسمع كلام مرتك وخالف رايها

الجار قبل الدار

جاي يحبي من تحت الي يمرد

راس الفرطاس قريب لربي

دزو خوه تح في الشربة

الباب الي يجيك منو الريح

حط الفلوس على فم الميت يضحك

غرغر يا غراب

خانها ذراعها قالت مسحورة

ما يعرفوه بقري كان بالكرشة

ما يعجبك في الدهر كان طولو

يشعل في النار ويقول الدخان منين

الشكارة و البحر

شد مشومك لا يجيك ما أشوم

لشكون تحرقس يا مرت الاعمى؟

خوذ العلم من روس الفكارن

الي ما يدريه يقول سبول

خوذ بنت عمك تصبر علي همك

وين تحط نفسك وين تصيبها النفس نفسك و انت طبيبها

حدك حد المسقي اما المسفوف يغصص

كي عكّاز الأعمى مرّة في الطّهر و مرّة في النّجاسة

بعد ما شاب علقولو حجاب

لسانك صوانك، إذا صنتوا صانك، و إذا خنتوا خانك

من معرفتك في الأجواد, تسلم على بو سعدية

لاَ تَــاخُــذْ رَايْ المْــرَا، ولاَ اْتـبَّعْ البهيم منْ وْرَا

الكلب النباّح يجيب العنه لمّاليه و الكبش النطّاح كل نعجه تفرح بيه

إخدم على روحك ودیر عشیشة ، لا تنفعك لا فاطمة لا عیشة

يمين البكوش في صدروا

وهره و الدجاج يكحّ

عريان المؤخرة وفي يده خاتم

اضرب القطوسة تتربى العروسة

خذها من يد شبعان اذا جاع وما تاخذهاش من يد جيعان اذا شبع

بوس الكلب من فومّو حتّى تقضي حاجتك منّو

اللي برجو بالمرمة يموت في سطل بغلي

كان النّوم يكبّر راهو كبّر القطاطس

كول مع الفار وماتاكلش مع بوالأظفار

الي متغطي بحوايج الناس عريان

إلي متعدي على زرع الناس يحط زرعو في الثنية

لاَ يعجبك نوّار دفله في الواد عامل ضلايل * و لا يعجبك زين طفله حتّى تشوف الفعايل

أَرْفَــعْ صَدْرِكْ فِي بْــلاَدْ بُـــوكْ وْجَدِّكْ

المكتوب عجبين لازم تشوفها العين

كرع البهيم عمرها ما تجي منها زكرة

إذا بنتك دبت وحبت أسال أمها ايش خبت

وكــــــــــرك وكـــــــرك ولو علــــــــــى عــــــــــود يــــــــــابس

الطبال ضرب و العريس هرب

كان يجيب منك ربي اعمل مني كرما وكول مني الكرموس

الي يعرف عزو كلام الناس ما يهزو

تبديل السروج فيه راحة

خاف ربّي و خاف ملّي ما يخافش ربّي

اختار المرا العاقلة ,حلوة اللسان والفحلة , أما العينين و السالف راهم عند البغلة

أسئل على صاحبك استغناشـــي، أمــا الطبيعة هي هي

أُرْقُـــدْ فِــي الحْصِيدَةْ بْلاَ سِــرْوَالْ وْبَعْدْ قُولْ الْسُــــرَّاحْ أَوْلاَدْ حْـــرَامْ

شطر الرجولية لهروب

البهيم العثار لا بدلو من طيحة

جبال ما تتلاقاش أما الرجال تتلاقى

قرد موالف و لا غزال شرود

قهوة و قارو خير من سلطان في دارو

عمل يا خصيب تصيب ما يجيش في البقرة يجي فالحليب

ما تضرب الكلب كان كتعرف مولاه

جاب الصِـــيد مِن وذنـــو

يا صاحبي يا صاحبي يا خيرلي من بلاش، الماكله تاكل و في العرك ما تسواش

دبارة الفار على مول الدار

الدوام ينقب الرخام

ماعندك سوّ خير من البركة فيك

اسأل مجرب ماتسألش طبيب

اللّي بيه سكرة بيه صبّاط

الربح في مشي الأقدام و البخل باب الخسارة، و اللّي ما عاونتوش ليّام ما تعاونوش بالدبارة

يا مآمن الرجال، يا مآمن الما في الغربال

حلو و مر حتى يتعدّى العمر

قالو يا بابا خوذلي مرا . قالو في طلاق امك انا حاير

اللّي تاكلو المعزه يطلع على ظهرها دباغ

أنا نخيّطلو في شفايفو، و هو يتحلّف في الإبرة و الخيط

اكويني يا داود كان مازلت نعاود

يطول ليلها و تعلف

صام صام وفطر على جراده

اللّي في كرشو التبن يخاف النار

يا مزيّن من برّا شنيّه حوالك من داخل

خصك غير السواك يا عوجة لحناك

سعود موش تعرية زنود

زوز لفاعي في غار ولا زوز نساء في دار

سكران و حاذق

الجهامة و البهامة

استنى يا دجاجه حتى يجيك القمح من باجه

اللّي تبّع معشوقها يطول الزمان و يعوقها

يا مبدّل لحيه بلحيه تشتاقهم لثنين

كانك خياط تبّع الغُرزه

طَنْجرَه و لقَاتْ غطاها

هرب من القطرة جا تحت الميزاب

اللّي فاتك بليله فاتك بحيلة

ولدها على ظهرها وهي تلوّج عليه

آش يخرّج العروسة من دار بوها

ميات نمّاله دخلو لهاك الغار

ما يكبر في دارك كان القرع

صنعت بوه لا يعايروه

قالو يا بْحَر مَكْثر مُوجاتك قالو الجايات اكثر من الرايحات

أش جاب القمح للقصيبة وأش جاب الورد للقمام وأش جاب مباركة لحبيبة و أش جاب الفندق للحمّام و اذا القردة تجى طبيبة حتّى من الضبع يجى حجّام

ما يدوم في الواد كان حَجرو

اللّي ياكل لحمة اكبر من فمو يتخنق بيها

في المال و لا في صحّة لبدان

اللّي تعرفو خير ماللّي ما تعرفوش

قولوا الله يهديهم، عملو الخير في الناس ونساو واليدهم

تعارك الريح و البحر جات الضربة في المراكب

شكون شكّار العروسة؟

قصّ الرّاس تنشف لعْرُوقْ

يغطي في عين الشمس بالغربال

دَخّلْنِي نْخَرْجِك

إذا وكلت شبّع ، وإذا ضربت وجّع

اللّي ما عندو المال في اركانو، عندو العسل في لسانو

المَا الماشي للسِّدره الزيتونه أَوْلى بيه

تعاركو سعد و سعد الله ، حطّو مباركة في الحبس

فليّس مع فليّس يْوَلّي كديس

الفلّوس ما ينقب كان عين خوه

راعي في بلادي ولا سلطان في بلاد الناس

بـكـــا العينينِ يفضــح و بكــا الـقلـبِ يذبح

الجمل كان يرا حدبتو تتقطع رقبتو

اللي تِشكيلو يبكيلك

طول عمري نوازي في الوز، و في الوز ما عرفت نوازي، يا لحيتي ليك الجز من خلطتي في الكوازي

اللي تلموا النمالة في عام ياكلو الجمل في فم

عْـيـِيتْ من الـْمـَشـْيْ و الجـّيْ وْلاَ حـَدْ خـْذا بالـْخـَاطـِرْ..

جْرَالـِي كِيف عـَسْكـَرْ الـْبـَيْ بـَايـِتْ نـْعِسْ عـَالـْقنـَاطِرْ

إذا حبّوك الناس لا تشقى لا تتعب

ما ادخًل لدارك كان القمح والشعير، اما الفول يقربع

اللّـي فـــات مـــــــــــات

ما دوا الفم الأبخر.....كان السّواك الحارّ

اللّي يعمل الخير ما يشاورش

سبعه صنايع والرزق ضايع

لا دار و لا حانوت و لا جبّانه وين يموت

صْلاة الڤِــياد جمعة و اعياد

ضربه في غير جنبك كنها في حيط

اذا تحب تفيّش تبّع الفيّاشه و اذا تحب تعيش حتى البهايم عيّاشه

أسال على صاحبك استغناش أما الطبيعه هي هي

اللّي تضربو يدو ما توجعوش

سيّب الحمام و إجري وراه

الجرح يبرا يا صبرة و تبريه الضميده ، و كلمة السوء تبات و تصبح جديدة

ركبوه عالبهيم مد ايدو للشواري

قلها باش موالفه يا قدّيدة .قالت بالملح والشريطة

لا تجري جرية النعامة و لا تشابط سماء بيديك... ما تاخذ الا ما يكتبلك وما تكسب الا ما يعطيك

صبري على روحي ولا صبر

الناس عليّا

نداوي جروحي بروحي ولا من

يعلم بيّا

اعمل الخير في اهلو، اذا ما رجعوه يقرّو بيه

كي الزير المتّكّي... لا يضحّك ولا يبكّي

اللّي يستنى خير مـ اللّي يتمنى

الراس المربوط قرعة خير منو

سوق النساء سوق مطيار يا داخلو رد بالك... يورّيوك من الربح قنطار وياكلولك راس مالك

اعمل يا خصيب تصيب اذا ما يطلع في الزبدة يظهر في الحليب

الصوف يتباع بالرْزانه

المبسم صغير و الماكلة ماكلة بعير

كنت حاسبك حجر المرجان يصنعو بيك البرايم ،طلعت حجر وديان تمشي فوقك البهايم

كثر الكحل صالح للعين و العين للقلب ردة

اللي جايبو النهار هازو الليل

الّلي ما يشبع من القصعة ما يشبع من لحيسها

يقرص و يدو تحتو

اللّي يحسب وحــــدو يفضــــــلو

دار الزوّالي مليانه بالقسم على الله

يا ڤلبي يعطيك عزا، انا نفَرغك و انت تتملـــى

قلّو يا لعمى علاش تلوّج ؟ قلّو على قفة مل عينين

ولدك على ماتربّيه وراجلك على ما تسنّسو

اللّي يحشم من بنت عمّو ما ياخوهاش

المسلفة مردودة

محلا ضحكات النساء لوكان فيها يدومو ...الحوت يعوم فـ الماء و هوما بلا ماء يعومو

انا مريض منك وانت تهوى عليّ

ضرب الهجّالة لبنتها، غطّاتها بمرڨوم و ضربتها بسعفة

دلّيتو لا حبّ يندل للخير ولاهو فاعلو، كيف اللّي جاب العسل في جلد الكلب لا يتاكل و لا يتباعلو

خبزي مخبوز وزيتي في الكوز

لا نحبّك لا نصبر عليك

اللّي بُرجو بالحكّاكه يُقعد ديما هكّاكه

النوم بعد العواصر غواصر

البهيم بهيمي و نعرف نهيقو

اللي خذالك خبّالك

الخبز البايت ولا سفنج الشمايت

خوذ العلم من روس الفكارن

القلاع حرير والوسقة فحم

سكت شهر و نطق كفر

فما ناس هوما هوما وفما ناس كي لعسَل في الڨرجوما وفما ناس ملك الموت و لا هوما

جا كاري ولّى ملاّك

يكذب و كذبو ايجد عليه

المسلفة مردودة

اعمل كيف جارك ولا حول باب دارك

اللّي فيه طبّة عمرها ما تتخبى

بهيم ڨدم قرعه

يا داخل بين البصله و قشرتها ما تُخرج كان بِنتُونتْها

القلاع حرير والوسقة فحم

جاي يحْبُو تحت من يِمْرِد

سعدك يالمتعوس، مشى البرد جا الخنفوس

على عين تتذارى ميات عين

مَبْعِدْ مَكّة على بُوصبّاطْ

وقفت الزنقه للهارب

اربط البهيم حذا البهيم..اذا ما علمو الشهيق يعلمو النهيق

راس الفرطاس قريب لربي

باتْ مع الجْرانْ صْبَحْ يڤَرْڤرْ

عزوزه ما يهمها قرص

كيد النساء كيدين ومن كيدهم جيت هارب... يتحزموا باللفع و يتخلخلوا بالعقارب

اذا فاتك الكلام قول سمعت واذا فاتك الطعام قول شبعت

اللّي حبني ما بنالي قصر و اللّي كرهني ما بنالي قبر

بفلوسك تميّل كبّوسك

كيف الطبل، صوتو عالى وجوفو خالى

اللّي شاهي شهوه يعملها في عشاه

في الوجه مرايا و فِالقْفا فلاّيه

ما توصّي يتيـم على نواح

ملّسْ من طينكْ يقعدلك إذا ما جا بُرمة يجي كسكاس

العين ما تعلاش على الحاجب

كبّوا القهوه من عماهم وقالوا الخير جاهم

مشات للحمّام جابت اخبار عام

الله ينجينا من الوقت الكاسد والجار الحاسد والضنى الفاسد

الهدّه هَدِةْ صيُوده و الرَجْعَه َرجْعِتْ قرُودَه

إيمين البكّوش في صدرو

حْبَل الكذب قْصير

اللّي تراه راكب على فُركه قلّو مبروك لحصان

اللّي يسرق يغلب اللّي يحاحي

الصلح بعد العداوة أطيب من الحلاوة

اجبد ما ترد الجبال تتهد

كي الحنة في ساق البْغَلْ

مولا التاج يحتاج

كل واحد شيطانو في جيبو

بعد ما شاب هزوه للكتاّب

اللّي يعطيك حّبَلْ كتفوا بيه

الحنش لا يحفـــر غار لا يبـــات لبرّه

قلّو وين وذنك قلّو اهيا

ما تـَنـْفـَعْ الـْوْصـَايا في الـْعْبـادْ الـْفـَسّـَايا..

عمشه في دار العميان

عينيك في راسك تعرف خْلاصك

الحنضلة ما تولي تفاحة و الخرشي ما تبان فيه ملاحة

الفاهم شاقي

إلّي برجو بالفحم يعيش بين الكوانن.

كي قنديل باب منارة ما يضوي كان على البراني

تعارك مع صاحبو في الشارع روّح لـ مرتو طلّقها

تندب و عينها في سماعيل

عز نفسك تصيبها

الرقاد في البرد ولا ضيافة القرد

عاش يتمنى في عنبة مات جابولو عنقود

ضحكولو تمد على طولو

كعك ما يطيّر جوع

ياحافر حفرةالسوء ما تحفر الاقياسك، و يا زارع الشوك من توّا، تشوف العجب في راسك

الليل بوذيناتو و النهار بعويناتو

رضينا بالهم والهم مارضاش بينا

بَڤرَ الله في زَرْعْ الله

شعيري والملاحة ولا قمح الناس والقباحة

قرد موالف و لا غزال شرود

كِي سِيدي كِي جْوادو

كثر الهم يضحّــــــــــــــك

اللّي ما يلْحقش اللِّيه ايقول مَنْتنْهَا هِيّا

يا نهار الموت يا نهار الكشفة

قالو حصاني يصف السدرة ; قالو هذا حصانك و هذي السدرة

تغدّا و آتهدّا كيف يكون عليك الدّين، تعشّا و آتمشّا كيف يكون خطوتين

الأصحاب في الوسع قداش منهم و في الضيق ماتلقاش واحد منهم

انا نقلك يا سيدي و انت افهم قدرك

الرّاجل كيف عبّود الزّمّيط قد ما تعصرو قد ما يقر زيتو

الحنا حرشا و الحنانة عمشا و العروسة طرشا

ما تُخرج الصد قه , كان ما يشبعو امّاليها

اللي تحبو قابلو و الي تكرهو جانبو

وحلة المنجل في القلة

الطويل يجبد العرجون و القصير يموت في الكانون

مالطبق ل بيت النار

القلاع حرير والوسقة فحم

لا تصوحب فرطاس و لا تاخذ منّو نصيحة كان جا ربّي يحبوا ما يخليلوش راسوا فضيحة

لا تعَظّمْ لا تِتْبْلَى

أصحاب السّعود لرياح تحطبلها

حسبتك صندوق ... ونحط فيك الغالي

ظهرتلي سردوك ... شوشتك من تالي

كي الفول... أوله منافع و آخرو مدافع

يا مكثّر الأصحاب يا متلّف خيارهم

ما تهبط البلايا كان عَلـْ الولايا

ما تعرف العدو من الصديق غير فالشدة والضيق

اللّي عندو لكْعبْ يلعب كيما يحب

الأنثى كي العصيدة، كان بردت ما يقربها حدّ

ما يْحِس الجَمرة كان الِّي يعْفَسْ عليها

عصفور في اليد ولا عشرة فوق الشجرة

كي المنشار، طالع ياكل هابط ياكل

فين فلوسك يا حمّار ؟ في الصفيحة و المسمار

اللي جايبو النهار هازو الليل

خيار المومن قلبو صافي

الّي تلسعو الحناش يبات يستخايل

اللي يبيعك بل الفول بيعو بالقشور

تبديل السروج فيه راحه

صاحب صنعتك عدوك

كلمة لا ما تجيب بلى

كلّ شي بالسيف كان لمحبّة بالكيف

جا من تالي و يعيّط يا مالي

كَسْكَسْلُو يَرْجَعْ لَصْلُو

جبيبتك ما تبيعها تشتهيها في ربيعها

يالاهي بهمّ الناس و همّك مشوم أكداس

تبع الكذّاب لفم الباب

ضربة بدمها ولا كلمة بسمها

إحذر عدوك مرة و إحذر صْديقك ألف

الزلقة بفلقة

تعرف لِبْلا و وين خبّا ولادو

بوزيد شْباب و زاد طاح عليه الباب

نزرعو تفاح يطلع هندي.. البخت طايح والزهر ماعندي

قلّو وخّر وخّر قالّو ظهر لبهيم وفى

الجنازه حاميه و الميت كلب

يجيك البلا يا غافل

المجراب تهمزو مرافقو

قيس قبل ما تغيص

العاقل في البڨر نطّاح

رتاحوا العرايا من غسيل الصابون

حَرْثْ لَعْجُول مَا يكَبّرْ نْوَادِرْ

اللّوم بعد القضاء بدعه

الليل بوذيناتو و النهار بعويناتو

غيب يا قط ألعب يا فار

دبارة الفار على مول الدار

إذا رادلك ربي بالشفاء يعرضك الطبيب في الثنيّه

الأجرب حكّاك والخاين شكّاك

الكلام مقياس موش حصيرة يفرشوها الناس

جزار يْعضّم على مراڨزي

يسبّق فِالحصيره قبل الجامع

مشيت للبحر نشكي من كبر هبالي .. حتى البحر وخّر ووجعو حالي

تعيـــــش الكلاب في روس المجانــــــين

عارك عارك و خلّي للصلح مكان

المسبط ما درى بالحافي و المرفّه يضحك على الهموم، اللّي راقد في القطن دافي و العريان منين يجيه النوم

مَخْيبك يا صنعتي عند غِيري

اشكون يْقول للصّيد فمّك أبخر

اللّي يحب اللّلو يسهر الليل بكلّو

فوله مسَوْسه طاح بيها غرنوق أعْورْ

دخانك عمانى وطعامك ما جانى

الطولْ والخسارة ...كي سلُّومْ النصارى

ما ناقص المشنوق كان ماكلة الحلوى

الغيرة تذهب الشيرة

ضربنا على ترامينا، سمعنا ما رينا

ذراعك يا علاّف

لقاها تـبـكـي مـن هـمّ الـرّجـال قـلـّهـا أسـكـت تَـوْ نــاخــذك

جارك بحذاك اذا ما يرى وجهك يشوف قفاك

قالها يا وذن شبيك كبيرة قاتلو كل يوم نسمع غريبة

شويّه مالحِنّه و شويه من رطابت ليدين

كل شي في وقتو، و اللّي يزرب في خبزتو ياكلها عجين

كي حاجتي بيك يا وجهي خبشوك القطاطس

اذا عرضتك القطوسة ضعيفة أرجع مالسقيفة

ما تقول خذيت كان متسكر باب البيت

الطفلة إذا بارت على سعدها دارت

ما فمّاش قطّوس يصطاد لربّي

اللّي ما يلحقشي عالعنب يقول ماقرصو

اللّي عجبك رخصو طيّش نصّو

زواج ليلة تدبيرو عام

عمي عماني وخالي خلاني وبابا شق البحور وجاني

دزّو خوه طاح في الشُربه

بات مع الدجاج صبح يقاقي

كانت تشخر زادت بف

اللّي يركب عل البهيم يحمل بَصّو

يحبّوها سبّاڨة و جراية وما تاكلش شعير

امّالي الميت صابرين و اللّي يعزّيو كلاو رواحهم

كان عندها زيت في حكتها راهوا بان على قصتها

خلاّت راجلها ممدود ومشات تعزي في محمود

الهبال وحلة و العقل زريعة ..واللي راح عقله ما عاد فيه نفيعة

اللّي جابتو ساقيه العصا ليه

الرجال تتلاقى والجبال ماتتلاقاش

اللّي وجهها يفجعها رزق بوها ينفعها

للّي ما تقدر ترُدلو عِدلو

يا سعد من زار وخفّف

بصّت و لمّتْ تْراميها

العزري أقوى من سيدوا

كلامك مع اللّي ما يفهمكش ينقّص مِل لَعْمار

تهنى الفرطاس من حكّان الراس

كل شيء ينقص كان الحديث يزيد

لو تلبس من الذهب صريمة ما نراك كان بالعين القديمة

بعد الّي كلا قال بسم الله

لا يعجبك نوّار دفلة في الواد عامل ظلايل و لا يعجبك زين طفلة حتى تشوف الفعايل

حمل الجماعة ريش

الاسْم العَالي و المَرْبطْ الخَالي