فتوى خاصة في مسألة العلوش والقفة والورقة الخضرى

فتوى خاصة في مسألة العلوش والقفة والورقة الخضرى 

ـــــــــــــــــــــــــــــــــــــــــــــــــــــــــــــــــــــــــــــــــــــــ

لمن قال لي انّ حركة الرّشّ هي أفضل من باقي الأحزاب لانها على اتصال مباشر بالجماهير وهي توة قاعدة تخدم في خدمة صحيحة تعطي في القفّة و العلّوش والورقة الخضرى ...

نحب نقلو

1 ـ العلوش سنّة مؤكدة و موش فرض و زيد كيف يتشرى بفلوس لحرام المسروقة من المال العام يُسقط منو الحكم الشرعي وزيدك معاه بونيس اثم كبير , و يدخل ذلك عند فقهاء الاسلام في باب المنكر و قد نهى صلّ الله عليه و سلم عن ذلك في قوله: إن رجالاً يتخوضون في مال الله بغير حق فلهم النار يوم القيامة. رواه البخاري... يعني هما باش يمشيوا للنّار وانتي معاهم , علما ان اضحِيتِك اللّّي باش تقوم بيها تقرُّبا الى الله تصبح باطلة باطلة باطلة ... وشرعا يحرّم الاكل من هاته الذّبيحة او التّصدق منها ...

2 ـ القفّة تُوفي يا خويا في نهارين اما هما باش يركبوك بيها سنين ولرُبّما يزيدو يِدَلْدْلُوا ساقيهم فوق ظهرك وظهر العائلة لا قدّر الله ...

3 ـ الورقة الخضرى ما نعرفهاش ومنحبّش نعرفها اذا كان باش توصلني للذّلّ باسم الطّحين الشرعي اللي يدخل في باب النفاق... وحكموا شرعا معروف جهنّم وبئس المصير ... 

4ـ سيدي خويا اللّي يحكي على السياسة من خلال القفة والعلوش وكلّ لوازم المطبخ ما ينجّم يكون كان كلب خاطر ما يِهِمُّوا كان كرشو و العظم اللّّي باش يِمَشْمْشُوا ...

روضة الدّريدي