المساجد لذكر الله و ليست شعبة للنهضة أو للنداء

المساجد لذكر الله و ليست شعبة للنهضة أو للنداء

يقول الله تعالى (وان المساجد لله فلا تدعو مع الله أحدا). 

و يقول الله تعالى “في بيوت أذن الله أن ترفع ويذكر فيها اسمه يسبح له فيها بالغدو والآصال رجال لا تلهيهم تجارة ولا بيع عن ذكر الله وإقامة الصلاة وإيتاء الزكاة يخافون يوما تتقلب فيه القلوب والأبصار ليجزيهم الله أحسن ما عملوا ويزيدهم من فضله والله يرزق من يشاء بغير حساب”.صدق الله العظيم: الآيات 36 و37 و38 من سورة النور.

 و جاء في الآثار (من جلس في المسجد فانه يجالس ربه)

أين هم من كلام الله ؟أولائك الموالين للنهضة في جامع اللخمي اليوم في صلاة الجمعة 

الذين بداووها ب "يا بطيخ يا جبان الجوادي لا يهان"...

ثم مرّوا إلى شعار العادة "الشعب مسلم و لن يستسلم" (على أساس وزارة الشؤون الدينية جابتلهم البابا باش يصلّي بيهم الجمعة)...

و انتهاء ب"الشعب يريد الجوادي من جديد" (و الله بديت نشك...يطلعش الجوادي هذا من العشرة المبشرين بالجنّة و الواحد ما فيبالوش)...

هذا الكل في بيت ربي...

ماناش نحكيو على فيراج في ستاد و إلا بطحاء قدام ليسي و إلا محطة متاع ميترو...

هذا في بيت ربي يا بوقلب...

و راهو ملللخر، لا حكاية إسلام،و لا شعب مسلم لا هم يحزنون...

الحكاية الجماعة تضرب عالفون دو كومارس le fond de commerce متاعها...

بالنسبة ليهم الجامع بلاصة يعملو فيها السياسة موش يعبدو فيها ربي...

بلاصة يعلّمو فيها الناس كيفاش تعبد النهضة موش تعبد ربي...

في الحالة هاذي، ماعادش جامع يلمّ الناس آما مسجد ضرار يفرّق بيناتهم...

فبحيث، و مادام السيد باندي و الدولة ما تنجّمش توقّفو عند حدّو، سكّر الجامع حتى لين يرجع جامع : موش شعبة نهضة كيما يحبّوه و لا شعبة تجمع كيما كان 

وجيع العباسي