اليوم محاولة إنقلاب الشقّ اللّي ما خذاش مناصب

اليوم محاولة إنقلاب الشقّ اللّي ما خذاش مناصب 

اليوم المجلس الوطني متاع التيار الإصلاحي في نداء تونس، بلغة أخرى محاولة إنقلاب شق اللي ما خذاوش مناصب في الحكومة و القصر على الهيئة التأسيسية لوضع اليد على الحزب... معظم مكونات هذا الشق من التجمعيين اللي خدموا الماكينة في الإنتخابات و خرجوا منها بيدهم على روسهم، و الإنتهازيين اللي يركبوا ديما على الموجة الرابحة، و توة متكتلين وراء حافظ قايد السبسي المساند من نبيل القروي و شفيق جراية و عبد الرؤوف الخماسي، حاصيلو، خمج All Stars...

بالطبيعة بالمناسبة قناة نسمة بصفتها هنشير ولد القروي تقطع برامجها التقليدية و تعمل تغطية مباشرة استثنائية للحدث و بلاتو فيه الناس الكل على نفس الرأي، لكلها جماعة السبسي جونيور... علاش ؟ خاطر من أهم مطالب تكتل الخماج المذكور هو تعيين نبيل القروي في الهيئة التأسيسية، و الكاميرا توري فيه يتبختر في المؤتمر و يصحح و يكشخ و يفرق في التصريحات...

القناة هاذي ماعادتش فقط عار على الإعلام كمهنة، بل ولات بزقة في وجه أي إنسان يؤمن بالحد الأدنى المضمون من الصدق و الكرامة و الرجلة في العمل بصفة عامة... تفيه على المرتزقة